炒輪三招

近排身邊多咗人炒輪，原因係好多散戶嫌買正股成本高，所以走去買窩輪，諗住以小博大。先排同個基金經理朋友傾開窩輪嘅問題，佢話有個客用100萬銀嚟投資，其中10萬銀用嚟炒輪，佔個portfolio一成，其餘九成就用嚟買正股。結果半年時間，10萬變30萬。

窩輪都可以炒業績
敏妮之前都叫人買輪，因為當你持有嘅股票已經升到高位，你覺得佢再升嘅機會係五五波，最啱就係take profit之後，將贏番嚟嘅一部份小注買輪，刀仔鋸大樹又好，用少少本錢捕捉剩餘嘅升浪又好。不過，敏妮最大弱點係唔識揀輪，每日中午睇電視都會見到位男士，喺鏡頭面前用急口令方式推介一隻輪，但敏妮成日覺得冇理由聽嗰幾分鐘就落投資決定，何況嗰位男士講免責聲明嘅時間仲多個介紹嗰隻輪！所以就問呢個朋友，「你個客點炒輪？」原來炒業績除咗可以應用喺正股，仲可以用喺窩輪度，就好似前一陣子，思捷（330）公佈業績，佢個客就喺公佈前一個禮拜買思捷嘅窩輪。另外，就係專搵創新高嘅股票，炒相關嘅輪。咁即係高追？朋友講，「通常一隻股創完新高之後，都會稍為回吐，就喺呢個時候買相關嘅窩輪。」以往炒股係趁高位沽貨，但家個市係炒momentum，創完新高反而有投資者追入，帶動隻窩輪升。

平衡風險唔好瞓身
「通常有番咁上下嘅正股，都有無數咁多隻窩輪，敏妮點知應該揀邊隻？」朋友話佢通常會揀街貨多嘅輪，「街貨多，個價冇咁易俾人舞嚟舞去。仲有，發行商有機會為咗收番啲街貨，將個價推高。」窩輪係用嚟平衡風險嘅工具，敏妮覺得真係想將窩輪當平啲嘅正股炒，唔係唔得，但要好好控制風險同埋睇住自己個投資組合。