10月16日，周二。恒生指數跌586.23，收28954.55；成交2008.33億元。10月期指跌754點，收28771點。恒指見 30000點後係咪後勁不繼？
天津市長戴相龍證實，中央政府將押後實施8月20日允許國內部分居民投資港股嘅計劃，因為試點方案錯綜複雜。
美月底減息機會降
美國樓市下挫對經濟仲係一項隱憂，影響一直延續到明年。貝南奇話美國物業對經濟係一個拖累，但美元1.4205兌1歐羅，油價則升穿86美元一桶，响咁環境下，10月31日減息機會卻已下降。
日本8月份房屋新建築合約減少43.3％（7月份減少23.4％），理由係6月20日起政府要求新建房屋可抗地震，上述新系統需七十天測試（過去二十一天），令新建築房屋合約由6月份上升6％變成7月起下跌（唔少合約趕及6月20日前申請）。影響之下，雷曼兄弟將今年日本GDP增長率由2％降至 1.9％，政府正留意呢個係短期或長期情況，令人擔心明年日本經濟又陷衰退。日圓又回升，日經平均指數再回落，令澳元從二十三年高價回落。擔心日圓利差交易再出現unwind。
8月17日開始嘅上升潮，至今肯定已超買，短期出現調整正常過正常；不過，响美元弱勢未改變前，後市方向相信係反覆向上。
唔好同趨勢作對
恒生指數平均O响二十二倍以上，早已進入極高水平，但唔好同趨勢作對（Don't fight the trend），冇人事前知道邊個水平才係群眾極度樂觀，通常樂觀比率達70％，方向才出現改變（上周五美國係66％，代表後市仍有上升空間）。從前美元由低潮回升如1973、87、93年，都對股市造成傷害。呢次美元响2002年年初開始回落，何時見底？無法事先估計，唔排除响今年第四季尋底。價值投資者可能失去ride this cycle嘅機會而被left behind！8月17日至今嘅資源股及中字派股份，上升到最後一期都有瘋狂現象出現，1997年紅籌股熱潮係咁，2000年科網股係咁，依家資源股同中字派股份亦係咁。當最後嘅閒人都衝入市場去吸納高風險資產時，呢段日子先至係最易賺錢嘅日子。至於點樣响別人頭腦發熱時自己保持冷靜？講就易，做到卻難。圖表或可提供一定幫助。
中國經濟正進入最高工作人口百分比期，直到2020年（1979年開始一孩政策嘅結果）。唔單止咁，中國工作人口質素亦較1980至90年代改善。 1980至90年代，中國勞動主力係工人；踏入2000年代，中國提供嘅工作人口係已接受教育嘅新世代，佢地從事IT工作、管理層、基建項目，而非只能出賣廉價勞動力者。今年人民幣只升4％，印度盧比上升12％，上述亦係中國經濟過熱嘅部分理由。
中國經濟自2001年起進入小康局面至今，中國應該仲有十二年以上經濟繁榮期。中東則隨着油價急升而進入高收入期，大量外滙盈餘到處搵出路。反而日本步入老年期，美國經濟高峰期亦過去（低儲蓄率影響力漸浮現）。由於中國有外滙管制，中國人每年只可購入5萬美元外幣，上述外幣相信大部分用作炒賣香港股票之用，支持住今年恒生指數表現。
1980至2001年，中國因素令美國享受咗二十一年低通脹期，可隨時減息而毋須擔心通脹率上升嘅問題；2001年後完全唔同，因為中國本身嘅資源已無法應付巨大出口需求，有賴入口原材料才能支持出口增長率，令2001年起呢次美國減息潮刺激金價升上762美元，即使過去八年各國央行不斷拋售黃金。金價第一目標價750美元已打破，第二目標價830美元在望，最終目標價應係1050美元。1980年代開始嘅地球村理論，令國際間加強經濟合作，全球 GDP增長率加快，通訊事業發達，國與國之間加強彼此了解，透過分散風險，帶來1982年至今全球一次最長嘅經濟繁榮期（個別國家仍有衰退，但全球一直保持繁榮）。上述繁榮期到二十一世紀亦造成全球資源緊張，利淡因素開始浮現。响地球村理論下，中國全力開拓美國市場，1990年代令日本同德國產品世界競爭優勢漸失，造成今天中美貿易不平衡。下一步應該係世界資源重新分配（例如美國人無理由再佔用全球咁大量資源）。
油價進一步上升影響運油輪生意；反之，煤、鐵礦石及其他原材料需求，繼續推高乾貨輪租金。大量新乾貨輪下水係2010到2011年嘅事，但係估計乾貨輪租金响今年第四季見頂。
貨幣學派佛利民曾講過，貨幣政策嘅局限性就係响固定滙價下，無法固定利率及控制失業率（呢方面香港政府已證明上述理論正確。1983年11月至今嘅聯滙制度下，將港元同美元滙價固定，結果卻令港元利率及失業率大幅波動）。1971年9月美國放棄固定利率後，加強政府對利率及失業率嘅影響力，但最終卻引發信用泛濫，演變成今年嘅次按危機，令房地產價格回落及經濟受到拖累。房屋及金融服務佔美國GDP增長嘅40％，呢方面影響漸漸浮現。流動性（Liquidity）並非代表一大堆資金，而係代表投資者心態。如投資者願承擔較大風險及銀行願意提供寬鬆借貸政策，便可產生流動性；即使大量資金存在，亦唔會產生流動性。換言之，流動性出現係經濟上一種行為或心態，例如1990年香港政府嘅負利率政策下（利率低於CPI增長率），引發香港流動性。而內地股改到2005年下半年，亦引發流動性，情況有如堆滿積雪嘅雪山可以長期靜止，一旦引發雪崩又有如萬馬奔騰，而每次引發雪崩理由唔同，出現雪崩與否又同積雪多少無關。
資產價格形成趨勢難阻止
凱恩斯亦有描述呢個現象。喺1936年出版嘅The General Theory指出：資產價格（尤其係股票）一旦形成趨勢便不易阻止，例如出現向上趨勢而同時出現信貸寬鬆政策，便可產生流動性；股票價格一再向上，便產生股價重估，為投機者提供炒賣機會。响早上10時或11時出售後，下午又考慮重新返回市場……。股票迅速轉手，漸漸股價同公司業績資產無關，只受流動性所推動，直至去到一個極端。上述情況出現，心理因素大於真實價格預期，再唔受O、息率等掣肘，因為投機者只着重一天、一星期最多一個月內嘅利潤，而唔會理會該公司中長線因素，令傳統評估方法失效。個別投機者受當時嘅意見、主張所引導，再由樂觀情緒或悲觀情緒所主宰，直到有一天泡沫爆破為止。
凱恩斯嘅忠告係：寬鬆貨幣政策係引發泡沫嘅根源，泡沫最後結果往往係崩潰收場。描述十分精彩！
No comments:
Post a Comment