12月9日，周日。周二美國減息四分一厘機會已接近百分百，但減息半厘機會只有28%，估計明年1月及3月每次再減四分一厘。
長短棍非一般散戶可用
《金融時報》今年曾推介「Santa Monica Technique」，今年回報率達十倍，的確好，但非一般散戶可運用。上述策略簡單D講就係唔理會大市升降，而利用「長短棍」方式買入睇好行業股，同時拋空睇淡行業做對沖。今年拋空對象自然係美國金融股及房地產股，買入對象係高科技股，結果兩頭贏，例如次按保險股MGIC今年5月至今回落71％，蘋果、Google等又大升。明年計劃拋空項目係軟件公司，睇好項目係製造業中高科技股。
今年另一成功策略就係「牛眼投資法」，發明者係John Mauldin，並2004年出書推介。我老曹係最先向香港讀者推介呢個方法作者，並由2004年起採用佢方法。利用牛眼投資法係每年追求「三位數字」（即100％）或以上回報。牛眼投資法第一步係「Invest like a venture capitalist」，即專攻二線股，事前做足搜集工夫，搵出邊D行業正進入起飛期或轉虧為盈期。牛眼投資法較適合散戶採用，但必須自己做足功課，千萬不可跟我老曹買，因為專家如David Webb 去年聖誕前推介股份，今年恒生指數大升40％環境下仍跌27％；世上並冇必殺技也！作為venture capitalist，就係當一間企業開始轉虧為盈時立即介入，而非等到人人叫好時才介入。Early bird catches the worms，又或者投資D引入創新意念企業，最典型例子係呢幾年蘋果引入iPod後再引入iPhone，令蘋果股價由5美元升上180美元！本港成功例子如利豐（494）及思捷環球（330），利豐引入環球性採購概念，今天已成為藍籌股；思捷環球全力拓展歐洲品牌市場，亦成就非凡。如佢地起步期時已介入，各位如今已成為小富。另一機會五年前，港人由睇唔起國企、紅籌股轉為愛上國企、紅籌股所提供投資機會，例如森池兄推介國壽（2628）今年亦發足狂奔。唔好人云亦云，訓練自己成為「Top Gun」（股市第一槍手）或小李飛刀（例不虛發）。如何利用地緣政治及宏觀角度協助自己揀股？美元由2002至07年回落，既產生危機，亦出現大量商機；油價由10美元升上100美元，亦帶來危機同商機；金價由252美元升上845美元亦帶來機會……。任何事物都有正反兩面，睇錯市唔緊要（人誰無錯？），蝕15％離場；睇市便咬住唔放，最低要求100％回報。至於大藍籌股，留番畀退休人士或已經發達人士，並非仍在追求發達人之對象。明年唔易再透過投資大藍籌股去賺取大利；反之，二線股仍有機會，包括巴西、俄羅斯、印度及中國內需股，相信純利仍以雙位數上升。金磚四國經濟正由出口導向型轉為內需推動型，內需增長估計可維持到2010年。未來推動世界經濟引擎再唔係美國、歐洲、英國同日本，而係四大金磚國。財富正由OECD國家流向新興工業國，未來財富唔再自石油股、能源股及資源股，因為佢地正面對巨大成本上升及低邊際利潤，而且油價已升至半天高；新機會來自內需股及高科技股。
高盛證券指出，三十八個佢地跟開國家中，有二十六個明年GDP增長率下降，其中下跌最快係歐洲同日本，較美國更快。因此，全球明年GDP增長率將由今年4.7％降至明年4％。世界再唔係美國打噴嚏、全球傷風，而係互相影響、互相感染。
內地11月CPI可能創新高
12月5日閉幕中央經濟工作會議對明年中國經濟發展推出新措施：
一、經濟增長由偏快轉為過熱危險性依然存在，外貿順差仍在擴大，使外大量流入而加劇流動性，工業（特別係重化工業）投資增長過快。
二、價格上漲壓力增加，10月份CPI上升6.5％，房價上升9.5％。
三、節能減排形勢依然嚴峻，落後產能淘汰太慢，污染治理仍然滯後。
四、農業發展及農民持續增收難度較大。
五、就業壓力、教育、醫療、社保、收入分配、住房保障問題仍待解決。
2008年起，實施十年穩健貨幣政策正式淡出，取而代之係從緊貨幣政策。另外通過稅收及轉移支付，調節收入差距過大狀況，改善農民和城鎮收入差距，並提高企業制退休人員基本養老金標準。中國人行今年十次上調存款準備金率，呢次一下子上調一個百分點，有D出乎市場預料；上調後存款準備金率14.5％，已超過1988年13％好多。唔單止咁，1999年11月21日將存款準備金率由6％上調至7％後，每次上調都只係0.5％，呢次一下子重手上調1％。
今年內每次存款準備金率上調，股市都低開高收；最近股市指數由11月26日起上升，宣布上調存款準備金率後又點？呢次進一步上調，將影響明年銀行收入，影響集中銀行板塊。一般人估計周二公布11月CPI可能出現新高，如11月CPI創新高，唔排除年底前人民幣加息，對依家已處於弱勢A股不利。除加息手段外，媒體披露商業銀行明年起須逐季上報信貸計劃，進一步限制信貸增長率。
從緊貨幣政策壓抑股樓
利用從緊貨幣政策，防止價格由結構性上漲變成明顯通貨膨脹，減少過剩流動性由銀行體系流向資本市場，推動股市、樓價上升。今年上海股票綜合指數由去年底2675點上升至今，升幅超過一倍；全國七十個大城市房價第三季上升8.2％、北京上升13.5％、深圳上升17.6％，寧波和杭州亦上升超過10％。貨幣政策從緊，估計可壓抑明年內地A股及樓價漲幅。
上海12月8日公布，中國2010年造船能力有望超過二千一百萬載重噸，佔全球市場四分一或以上。中國已連續十二年成為全球第三大造船國，佔全球產量五分一。家中國有造船企業三千多家，其中大、中型共四百三十一家。去年完工量一千四百五十二萬載重噸，上升20％；新接訂單四千二百五十一萬載重噸，上升150％；手上訂單六千八百七十二萬載重噸，上升73％。
2004年中國參加鐵礦石價格談判以來，國際鐵礦石連升四年，累計升幅16.5％。2008年鐵礦石價格談判又開始，大摩及麥格理估計明年鐵礦石進口價上升50％。國家發改委公布11月國內鐵礦石價，唐山產含量66％鐵礦石價每噸1304元人民幣，較去年同期上升86.3％；預期未來鐵礦石價大漲，刺激上周鋼鐵股股價全線活躍。
No comments:
Post a Comment