散戶對機構

 
　　
美國明尼阿波利斯聯儲主席昨日表示，美國經濟正處不穩定狀態，而當局正面臨兩難局面，加息可以降低金融危機風險，但收緊政策必將導致低就業和低物價，估計聯儲局在往後5至10年內，都要用極低利率去維持現時的金融市場狀況。

聯儲局可能會好長一段時間內都唔會加息，原本係利好大市消息，但EBay及UnitedHealth等財報令人失望，4月費城製造業指數為負0.1點，遠差過預期的3.3，最近一周的首次申領失業人數增幅多過預期。美股向下，杜指一度跌123點，尾市收復部份失地，收市跌81點，報14537點；標普500指數跌10點，收1542點。

黃金價格暴跌，全球投資者減持黃金ETF倉位，而印度、中國、香港等地散戶都出現「搶金潮」。據聞本地的金條金粒，被搶到斷晒市。有朋友亦問我係咪時候可以買？我認為從有短期需要(如結婚)的消費角度買金飾品，現時並無不可，但諗住「撈底」的心態去作中長線投資，將面臨較大風險。散戶流入市場買金，但黃金ETF今年已有112億美元淨流出，幫襯ETF較多機構投資者，機構沽、散戶買，呢個現象值得深思。

有分析指此次金價暴跌可能是大機構獲利后拋盤，導致市場跟風情緒所致，因為這次「金災」是在基本因素改變不大、但跌幅就比想像中大。可能係國外機構刻意推低金價，引起市場瘋狂拋售黃金，價位打壓到足夠低的時候，然後大量買進，即係所謂「殺完好友殺淡友」的投機行為。

不過，有時投機行為又會成為轉勢的借口。金價又實在太高，只要看美國為首的全球央行近期不斷印鈔票，但金價不漲反跌，可見黃金上衝1920美元高位後，已見頂回落。事實上，金價好友今仗被殺個血流成河，一些有經驗的投資者在這波降價潮中斬獲頗豐。

現在的情況係好友淡友正激撕殺。黃金目前正處於「高危期」，後向難料。廣東省黃金協會副會長朱志剛話「金價上演高台跳水，但誰都難以預計到底什麼價格才是底部。」筆者在此前亦提過，有美國專家用金價及通脹比率計算黃金的公平值係多少？結果係每安士800美元才是正常價格，相對現價的大約1350美元，仍有好大下跌空間，目前除了急跌後可能出現大反彈外，又睇唔到任何可以支撐金價整體掉頭向上的原因。高盛建議將避險投資由黃金轉入天然氣，也是看到黃金貴、天然氣平的價差。

美國的波士頓馬拉松比賽爆炸襲擊事件，這再次提醒大家，恐怖主義威脅依然存在。全球第二大經濟體中國經濟遲遲未見明顯復甦，今年季GDP增長更係不增反降。而不單係黃金，所有的大宗商品價格都在持續下跌，已經反映了環球經濟放緩這個「新常態」；而美國聯儲局不斷泵水入市場，但只谷起股市，經濟仍然在龜速前進，事實上，美股近期已出現高處不勝寒的現象。歐洲更係唔使多講，龍頭國家德國的評級日前才被「打柴」，真係唔爆新鑊已經飲得杯落。市場人氣隨時可能會急轉直下。

黃金已形成熊市形態，長線向下易過向上，市場只要有任何風吹草動，例如某財困國家要沽金套現救市，市場勢必上演人踩人現象，金價一瀉就係千里。對上一次金市爆煲係1980年代，金價最高每安士750美元，唔夠兩年就跌至300美元，足足跌了六成。黃金係經濟同政治景氣的寒暑表，現時的經濟環境及通脹情況，又未必好過得過以前喎。黃金唔掂，我亦唔睇好石油，88美元的油價一都唔平，相關股份開始要迴避。

商品市場的弱勢擴散到股市，美股標普500指數已從高位回落3.5%，有不少美股交易員擔心調整的勢頭終於開始，由於銅、鋁、鎳已是一年低位，相關商品股自然無運行，Freeport-McMoRan, Cliffs Natural Resources, Peabody Energy,美鋼全部在一年低位。除此之外，己有一堆相對弱的股份插完再插，蘋果跌穿400美元，低見393美元，也是一年低位(比去年9月高位705美元跌了44%)，重機股Captepillar是去年7月以來低位，業績唔好的美銀今年股價也開始見紅。我怕是弱股先跌，慢慢擴散到強股去。